देवानगञ्ज । नेकपा एमालेका अध्यक्ष केपी शर्मा ओलीले नजिकिँदै गएको ११औँ महाधिवेशनलाई लक्षित गर्दै पार्टीभित्र नेतृत्व चयनका बारेमा स्पष्ट संकेत दिएका छन्। सहमतिको प्रयास–हो तर जबर्जस्ती मिलापत्र गराउने काम–होइन, ओलीले कार्यक्रममार्फत अघि सारेको धारणा यही हो।
कार्यक्रममा बोल्दै ओलीले सहमतिबाट नेतृत्व टुंग्याउने प्रयास आफूहरूका लागि पहिलो विकल्प रहेको तर सहमतिका नाममा कसैलाई झुक्याउने, थिचो–मिचो गर्ने वा करकाप पुर्याउने शैली अब नदोहरिने बताए। “सहमति सम्भव हुन्छ भने राम्रो, नभए स्वच्छ प्रतिस्पर्धाबाटै नेतृत्व आउँछ,” ओलीको भनाइ थियो।
उनी भन्छन्—“प्रतिनिधिले विश्वास गरे म निरन्तर रहन्छु, नदिए हट्छु। लोकतान्त्रिक पार्टीमा आग्रह–जिद्दीले होइन, प्रतिनिधिको भरोसाले निर्णय हुन्छ।”
ओलीले यसअघि सहमतिको प्रक्रियाले पनि आरोप झेल्नुपर्नेदेखि प्रतिस्पर्धामा जाँदा ‘गुट निर्माण’ का आरोप लाग्ने विडम्बनासमेत उल्लेख गरे।
यसैबीच, ओलीले आफूलाई हटाए मात्र सहमति सम्भव हुने पूर्वशर्त राख्ने धारणा स्वीकार्य नहुने स्पष्ट पारे। “म दबाबमा चल्ने मान्छे होइन। बाहिरै उम्मेदवारी घोषणा गरेर हिँड्नेहरूले मसँग संवाद नै नगरी सहमतिका कुरा गर्छन्,” उनले भने।
एमाले महाधिवेशनमा नेतृत्व चयनको प्रक्रिया सहमति वा प्रतिस्पर्धा—दुवै सम्भावना खुला रहेको भए पनि अन्तिम निर्णय प्रतिनिधिहरूको हातमै रहने ओलीको अभिव्यक्तिबाट स्पष्ट भएको छ।
प्रकाशित मिति: २०२५-१२-११ , समय : १७:५४:१० , २ महिना अगाडि