न्यूज ब्यूरो, सर्लाही । मधेश प्रदेशको सर्लाहीमा विहिबार साँझ भएको दुई समुदायबीचको झडपको क्रममा युवकमाथि छुरा प्रहार गरेको आरोपमा दुई जनालाई पक्राउ गरेको छ ।
सर्लाही प्रहरीले शुक्रबार छुरा प्रहार गरेको आरोपमा दुई जनालाई पक्राउ गरेको पुष्टि गरेको हो । सर्लाहीका प्रहरी प्रवक्ता दिपेन्द्र पँजीयार थारुले मूर्ति विसर्जनको घटनामा छुरा प्रहार गरेको आरोपमा दुई जना पक्राउ गरेको बताए ।
न्यूज ब्यूरोसँगको कुराकानीमा डिएसपी पँजीयारले दुई जना पक्राउ परेको पुष्टि गर्दै विस्तृत दिन नमिल्ने बताए । उनले कार्य व्यवस्तताको कारण बाहिरै रहेकोले सबै विस्तृत दिन नसक्ने प्रतिक्रिया दिए ।
यद्यपी, सो घटनामा छुरा प्रहार गरेको भन्दै मोहम्मद अमजद मिकरानी नामक पुरुषलाई पक्राउ गरिएको हो । जिल्ला प्रशासन कार्यालय सर्लाहीको ठाडो आदेशमा मिकरानीलाई शुक्रबार दिउँसो पक्राउ गरिएको बताईएको छ । अन्य एक जनाको नाम भने खुलाईएको छैनन् ।
बिहीबार साँझ गणेशको मूर्ति सेलाउन जाने क्रममा हिन्दु र मुस्लिम समुदायबीच झडप भएपछि स्थानीय प्रशासनले बिहीबार राति १० बजेदेखि अनिश्चितकालीन कर्फ्यु आदेश जारी गरेको हो ।
प्रकाशित मिति: २०२३-०९-२२ , समय : २१:४७:१७ , २ वर्ष अगाडि