राष्ट्रिय स्वतन्त्र पार्टीका सभापति लामिछानेका चालकको निधन

Aarya News 2852 पटक हेरिएको

घरको छतबाट खसेर घाइते भएका चालक दिलबहादुर थापाको मंगलबार मेडिसिटी अस्पतालमा मृत्यु भएको हो।

अस्पताल स्रोतका अनुसार दिउँसो २ बजेतिर उनको मृत्यु भएको हो।

आफन्तले उनको शव अस्पतालबाट लिएर गइसकेका छन्।

सभापति लामिछाने चुनावी प्रचारमा रहेका बेला वैशाख ४ गते बिहान पौने ४ बजेतिर थापा घरको छतबाट खसेका थिए।

सुरूमा भरतपुरमै उपचार गरेपछि थापालाई हेलिकप्टरबाट काठमाडौं ल्याएर मेडिसिटीमा उपचार थालिएको थियो।

सुरूदेखि भेन्टिलेटरमा राखेर उनको उपचार भएको थियो।

घटना भएको रात रास्वपाका महामन्त्री डाक्टर मुकुल ढकालका चालक पनि थापासँगै सुतेका थिए। थापा राति छतबाट खसेपछि चितवन प्रहरीले उक्त घटनाको अनुसन्धान गरेको थियो।

अनुसन्धानमा उनले राति रक्सी खाएको र त्यसैको नसामा हिँडदा छतबाट खसेको हुनसक्ने देखिएको चितवन प्रहरीका प्रवक्ता डिएसपी विजयराज पण्डितले बताए।

‘अरू कुनै कारण देखिएन,’ उनले भने।

प्रहरीले उनीहरूको कोठाबाट रक्सीका बोतल फेला पारेको थियो।

प्रकाशित मिति: २०२३-०५-०२ , समय : १५:३०:१५ , ४ वर्ष अगाडि