देवानगञ्ज। आज देशका विभिन्न भू–भागमा वर्षाको सम्भावना रहेको छ। मौसम पूर्वानुमान महाशाखाका अनुसार चार प्रदेशका केही स्थानमा भारी वर्षा हुनसक्ने देखिएको छ।
दिउँसो कोशी, बागमती र गण्डकी प्रदेशका हिमाली तथा पहाडी क्षेत्रमा र सुदूरपश्चिम प्रदेशका पहाडी तथा तराई भू–भागका एक–दुई स्थानमा भारी वर्षाको सम्भावना छ।
यस्तै, कोशी, लुम्बिनी र सुदूरपश्चिमका तराई क्षेत्रमा केही स्थान तथा मधेश, बागमती र गण्डकीका तराई भू–भागका थोरै स्थानमा मेघगर्जन र चट्याङसहित मध्यम वर्षा हुनसक्ने महाशाखाले जनाएको छ।
मंगलबार र बुधबार पनि मौसम पूर्ण रूपमा खुल्ने अवस्था देखिएको छैन। कोशी, बागमती र गण्डकीका हिमाली क्षेत्रमा तथा लुम्बिनी, कर्णाली र सुदूरपश्चिमका हिमाली भू–भागमा वर्षासँगै हिमपातको सम्भावना रहेको छ।
देशका पहाडी भू–भागका धेरै स्थानमा समेत मेघगर्जन र चट्याङसहित वर्षा हुनसक्ने पूर्वानुमान गरिएको छ।
भारी वर्षा हुनसक्ने क्षेत्रहरूमा बाढी, पहिरो तथा सडक यातायातमा समेत असर पर्नसक्ने भएकाले आवश्यक सतर्कता अपनाउन मौसम पूर्वानुमान महाशाखाले आग्रह गरेको छ।
प्रकाशित मिति: २०२६-०९-०७ , समय : १०:१५:१२ , २ महिना अगाडि