काठमाडौं। नेपालले १२ वर्षपछि स्कटल्यान्डमाथि टी–२० अन्तर्राष्ट्रिय क्रिकेटमा ऐतिहासिक जित निकालेको छ। स्कटल्यान्डको तितवुड मैदानमा जारी त्रीदेशीय टी–२० शृंखलामा नेपालले स्कटल्यान्डलाई २ विकेटले पराजित गर्दै सन् २०१३ यता पहिलो पटक उसमाथि जित हासिल गरेको हो।
टस हारेर पहिले ब्याटिङ गरेको स्कटल्यान्डले १९.४ ओभरमा सबै विकेट गुमाउँदै मात्र ९७ रनको योगफल खडा गर्यो। नेपालले ९८ रनको सामान्य लक्ष्य १९.५ ओभरमा ८ विकेट गुमाउँदै पूरा गर्न सफल रह्यो।
नेपालका लागि ओपनर कुशल भुर्तेलले ३० रनको योगदान दिए। उनले ३५ बलमा ४ चौका प्रहार गरे। नेपालले पहिलो विकेट २१ रनको अवस्थामा गुमायो, जसपछि लगातार अन्तरालमा विकेट खसिरहे पनि सम्हालिँदै लक्ष्य भेट्टाएको थियो।
रोमाञ्चक अन्त्य
नेपालले अन्तिम ओभरमा ४ रन आवश्यक हुँदा दबाबमा खेलिरहेको थियो। १९.४ ओभरमा आठौं विकेटको रूपमा किरण ठगुन्ना क्याच आउट हुँदा नेपाललाई १ रन चाहिएको थियो। त्यसपछि करण केसी र सन्दीप लामीछानेले संयमता देखाउँदै नेपाललाई जित दिलाए। करण ३ र सन्दीप १ रनमा अविजित रहे।
नेपालको बलिङ प्रदर्शन उत्कृष्ट
नेपालका लागि सन्दीप लामीछानेले घातक प्रदर्शन गर्दै ४ ओभरमा १ मेडनसहित ११ रन खर्चेर ४ विकेट लिए। करण केसी र दीपेन्द्र सिंह ऐरीले समान २-२ विकेट लिए भने ललित राजवंशीले १ विकेट हात पारे।
स्कटल्यान्डका लागि मिचेल लिस्कले सर्वाधिक ४६ रन बनाए। उनले ४६ बलमा ४ चौका र १ छक्का प्रहार गरे। अन्य खेलाडीमध्ये कप्तान म्याथ्यु क्रसले १५ र ब्रान्डन म्याकमुलेनले १० रन बनाउन बाहेक कोही पनि दोहोरो अंकमा पुग्न सकेनन्।
स्कटल्यान्डका बलरहरूको प्रयास व्यर्थ
माइकल लिस्क र सफ्यान सरिफले २-२ विकेट लिए भने ब्रान्डन म्याकमुलेन, मार्क वाट, ज्याक जार्भिस र जास्पर डेविटसनले १-१ विकेट हात पारे।
इतिहास पल्टाउँदै नेपाल
नेपालले स्कटल्यान्डविरुद्ध सन् २०१३ मा पहिलोपटक टी–२० खेल खेलेको थियो, जसमा ८ विकेटले पराजित भएको थियो। अहिले १२ वर्षपछि पुनः भिडन्त हुँदा नेपाल विजयी हुन सफल भयो। शृंखलाको पहिलो खेलमा नेपाल नेदरल्यान्ड्ससँग तेस्रो सुपर ओभरसम्म पुगेको प्रतिस्पर्धामा पराजित भएको थियो।
प्रकाशित मिति: २०२५-०६-१८ , समय : ०७:१९:१९ , २ हप्ता अगाडि