विराटनगर। विगत केही वर्षयता नेपालमा पत्रकारिता पेशाप्रति आकर्षण बढ्दो छ। नयाँ पुस्ता सूचना र प्रविधिमा अब्बल बन्दै जाँदा उनीहरू पत्रकारिता मार्फत सामाजिक चेतना र उत्तरदायित्व बोकेको आवाज बन्न चाहन्छन्। यसै सन्दर्भमा नेपाल पत्रकार महासंघ र आन्तरिक मामिला तथा कानून मन्त्रालयको सहकार्यमा विराटनगरमा सम्पन्न भएको सात दिने आधारभूत पत्रकारिता तालिम उल्लेखनीय कदम मान्न सकिन्छ।
पत्रकारिता कुनै सामान्य पेशा होइन। यसले समाजको दर्पण देखाउने मात्र होइन, मार्गदर्शन गर्ने जिम्मेवारी पनि बोकेको हुन्छ। त्यसैले पत्रकारितामा प्रवेश गर्नु चाहने व्यक्तिका लागि प्रारम्भिक तहमै व्यावसायिक ज्ञान, लेखन सीप, नैतिक मापदण्ड र सञ्चार माध्यमको प्रवृत्तिबारे स्पष्ट बुझाइ हुनु आवश्यक हुन्छ। यस्तै आवश्यकता पूर्ति गर्न तालिम केन्द्रित थियो।
तालिमले समाचार लेखन, आचारसंहिता, संसदीय पत्रकारिता, फोटो पत्रकारितादेखि अनलाइन माध्यम र कृत्रिम बुद्धिमत्ता (AI) को प्रयोगसम्मका विषय समेटेर समसामयिक र प्रयोगात्मक सामग्री प्रस्तुत गर्यो। अनुभवी प्रशिक्षकहरूको मार्गदर्शनले सहभागीहरूलाई आत्मविश्वास बढाएको अनुभव उनीहरूले सार्वजनिक रूपमा प्रकट गरे।
नेपालका विभिन्न स्थानीय तहबाट आएका ३६ जना सहभागीहरूको उपस्थिति र तालिमप्रतिको उनीहरूको गहिरो चासोले देखाउँछ कि पत्रकारितामा समर्पित र सक्षम जनशक्ति तयार गर्ने वातावरण बिस्तारै तयार हुँदैछ।
अब आवश्यक छ—यस्ता तालिमहरू केवल एकपटकको प्रयासमा सीमित नरही, निरन्तर अभ्यासको रूपमा अगाडि बढाइयोस्। विशेषतः प्रदेश र स्थानीय तहका पत्रकारहरूलाई लक्षित गरी तालिमको दायरा विस्तार गरिनु पर्ने देखिन्छ। पत्रकारिताको मुलधारमा नयाँ पुस्तालाई जिम्मेवार, तथ्यमा आधारित र निष्ठावान बनाउने यही मार्ग हो।
प्रकाशित मिति: २०२५-०६-१५ , समय : २१:३३:१३ , ३ हप्ता अगाडि