कञ्चनपुर। बिहानैदेखि पोल्ने घाम, बग्ने पसिना, र थाकेका अनुहारहरू। बेलौरी नगरपालिकामा गर्मीको यस्तो चपेटा परेको छ कि विद्यालयका घण्टीहरू पनि दुई दिनका लागि मौन भएका छन्।
नगरपालिकाले अत्यधिक गर्मीका कारण असार लाग्न नपाउँदै ‘गर्मी बिदा’ घोषणा गरेको हो। नगरभित्रका सबै सामुदायिक र निजी विद्यालयहरू मंगलबार र बुधबार बन्द रहनेछन्। नगरप्रमुख पोतिलाल चौधरीका अनुसार यो बिदा बर्खे बिदाबाट मिलान गरिने छ।
गर्मी यति बढेको छ कि सडकमा मानिसहरूको उपस्थिति न्यून छ। स्वास्थ्य संस्थामा टाउको दुख्ने, ज्वरो आउने, रिङ्गटा लाग्ने र आँखा पाक्ने जस्ता लक्षण लिएर बिरामीहरूको संख्या ह्वात्तै बढेको छ। बालबालिका र वृद्धवृद्धा विशेष प्रभावित देखिएका छन्।
शिक्षा क्षेत्र मात्रै होइन, नगरको समग्र जनजीवन अस्तव्यस्त छ। खेत-खलिहानदेखि बजारसम्म गर्मीको कहरले शिथिल देखिन्छ। नगरपालिकाले सर्वसाधारणलाई अनावश्यक हिँडडुल नगर्न, प्रशस्त पानी पिउन र चिसो स्थानमा बस्न आग्रह गरेको छ।
जलवायुको बदलिँदो रुप र यसको प्रत्यक्ष असरको यो ताजा उदाहरण हो — जहाँ सूर्यको तापले शिक्षाको लय समेत रोकेको छ।
प्रकाशित मिति: २०२५-०६-१० , समय : ११:१३:१४ , ४ हप्ता अगाडि